१५० दिवसांच्या विशेष कृती आराखड्यात राज्यात तृतीय क्रमांक; आयुक्त मनिषा आव्हाळे यांच्या नेतृत्वाखाली डिजिटल परिवर्तनाला गती
महाराष्ट्रात प्रशासन अधिक पारदर्शक, गतिमान आणि नागरिकाभिमुख करण्यासाठी राज्य शासनाने राबविलेल्या “150 दिवसांचा सेवाकर्मी कार्यक्रम – ई-गव्हर्नन्स सुधारणा मोहीम” या उपक्रमात उल्हासनगर महानगरपालिकेने उल्लेखनीय कामगिरी करत राज्यात तृतीय क्रमांक पटकावला आहे. या यशाबद्दल महानगरपालिकेच्या आयुक्त मनिषा आव्हाळे (भा.प्र.से.) यांना मुख्यमंत्री देवेंद्र फडणवीस यांच्या हस्ते सन्मानित करण्यात आले. या सोहळ्यास सांस्कृतिक मंत्री आशिष शेलार यांचीही उपस्थिती लाभली.
राज्यातील विविध शासकीय संस्था, महामंडळे, प्राधिकरणे आणि स्थानिक स्वराज्य संस्थांच्या कामकाजाचे कडक निकषांवर मूल्यमापन करून हा गौरव प्रदान करण्यात आला. भारतीय गुणवत्ता परिषद (QCI) या त्रयस्थ संस्थेमार्फत पारदर्शकता, कार्यक्षमता आणि तांत्रिक वापर या निकषांवर संस्थांचे मूल्यांकन करण्यात आले.
डिजिटल प्रशासनाकडे ठोस वाटचाल
उल्हासनगर महानगरपालिकेने गेल्या 150 दिवसांत प्रशासनात लक्षणीय बदल घडवून आणत डिजिटल युगाशी सुसंगत अशी कार्यपद्धती विकसित केली आहे. ई-ऑफिस प्रणालीचा अवलंब करून कागदविरहित (पेपरलेस) कामकाजाला चालना देण्यात आली आहे. यामुळे निर्णय प्रक्रियेला गती मिळून कार्यालयीन कामकाज अधिक पारदर्शक झाले आहे.
तंत्रज्ञानाचा प्रभावी वापर
महानगरपालिकेने GIS (Geographic Information System) सारख्या प्रगत तंत्रज्ञानाचा प्रभावी वापर करून नागरी सुविधा अधिक अचूक आणि नियोजनबद्ध पद्धतीने उपलब्ध करून दिल्या आहेत. शहर नियोजन, मालमत्ता नोंदणी आणि सेवा व्यवस्थापनात या तंत्रज्ञानाचा मोठा उपयोग झाला आहे.
नागरिकांना ‘घरबसल्या’ सेवा
नागरिकांना सुलभ सेवा देण्यासाठी व्हॉट्सॲप चॅटबॉट, ‘आपले सरकार’ पोर्टल आणि ऑनलाइन सेवा प्रणालींचा प्रभावी वापर करण्यात आला आहे. मालमत्ता कर, पाणी बिल भरणा, तक्रार निवारण यांसारख्या सेवा आता घरबसल्या उपलब्ध झाल्यामुळे नागरिकांचा वेळ आणि खर्च दोन्हीची बचत होत आहे. यामुळे प्रशासनाबद्दलचा विश्वास अधिक दृढ झाला आहे.
सातत्यपूर्ण यशाची परंपरा
उल्हासनगर महानगरपालिकेची ही कामगिरी एकदाच मर्यादित नसून सातत्यपूर्ण प्रगतीचे प्रतीक आहे. यापूर्वी 2025 मध्ये ‘100 दिवस कार्यालय सुधारणा कार्यक्रम’ अंतर्गतही पालिकेने राज्यात प्रथम क्रमांक पटकावला होता. या सलग यशामुळे प्रशासनातील सुधारणा ही केवळ उपक्रमापुरती मर्यादित न राहता ती संस्थात्मक पातळीवर रुजत असल्याचे दिसून येते.
नेतृत्व आणि टीमवर्कचा संगम
या यशामागे आयुक्त मनिषा आव्हाळे यांचे सक्षम नेतृत्व आणि संपूर्ण प्रशासकीय यंत्रणेचे समन्वयित प्रयत्न हे महत्त्वाचे घटक ठरले आहेत. अधिकारी व कर्मचाऱ्यांनी डिजिटल परिवर्तन स्वीकारत नव्या तंत्रज्ञानाशी जुळवून घेतल्यामुळे हे यश शक्य झाले आहे.
आयुक्त आव्हाळे यांनी या यशाचे श्रेय संपूर्ण टीमला देताना सांगितले की, ही कामगिरी सर्वांच्या एकत्रित प्रयत्नांचे फलित आहे. भविष्यातही नागरिकांना अधिक पारदर्शक, सुलभ आणि जलद सेवा देण्यासाठी आम्ही कटिबद्ध आहोत.
भविष्यातील दिशा
उल्हासनगर महानगरपालिकेने राबविलेल्या ई-गव्हर्नन्स उपक्रमांमुळे शहराच्या विकासाला नवी दिशा मिळत आहे. डिजिटल प्रशासनामुळे केवळ कामकाज सुलभ होत नाही, तर भ्रष्टाचाराला आळा बसून पारदर्शकता वाढते. आगामी काळातही अशा उपक्रमांमुळे नागरिकांना अधिक दर्जेदार सेवा मिळण्याची अपेक्षा व्यक्त केली जात आहे.
उल्हासनगरचा ‘ई-गव्हर्नन्स पॅटर्न’ हा केवळ एका शहरापुरता मर्यादित न राहता, राज्यातील इतर स्थानिक स्वराज्य संस्थांसाठीही प्रेरणादायी ठरत आहे. पारदर्शकता, तंत्रज्ञानाचा वापर आणि नागरिककेंद्रित प्रशासन या त्रिसूत्रीवर आधारित हा विकासाचा मार्ग भविष्यात अधिक बळकट होणार, यात शंका नाही.
प्रविण डोंगरदिवे
प्र. माहिती अधिकारी
जिल्हा माहिती कार्यालय, ठाणे
